7 сакавіка (чацвер) у філіяле Веткаўскага музея адбудзецца адкрыццё новай выставы "Арнаменты Падняпроўя: Сон і абуджэнне”.

Падняпроўе – рэгіён найбольш выразных і багатых у сваёй разнастайнасці мастацкіх традыцый абрадавых ручнікоў.

Менавіта арнаментам Падняпроўя мы прысвячаем цэлы праект, пад назвай "Адкуль родам знакі на нашых ручніках?". На першай выставе ў межах гэтага праекту быў прадстаўлены арнамент "Крючча".

І вось надышоў час пазнаёміць вас з наступным знакам - "Сон і абуджэнне"

На белым абрусе, на белявой кашуле, на белым жаночым “платку" і, безумоўна, на ручніку - на ўсім тканым космасе Неглюбкі жывуць "вядзьмедзі”. Яны ж "мядзьведзькі”. Ёсць “бальшыя” і “малыя”, “сляпыя” і “зоркія”. І ўсе яны ходзяць “па мяжы”.

Мядзведзь - архаічны знак звера-татэма. І гэта сон Зямлі.
Калі "вядзьмедзь" – сон Зямлі, то чым узорныя тканіны пазначаюць-выклікаюць яе абуджэнне?

Вадой! “Дзе маці плачэ – там рака цячэ…”. Дарэчы, яшчэ адзін абрадавы локус – калодзежы і крыніцы: “Дзе сястрычанька – там крынічанька”, альбо “там калодзежы…”

У шмат якіх тэкстах Традыцыі можна знайсці рэцэпты ўзнаўлення. У тэкстах тэкстылю, узорнага ткацтва - гэта "сон і абуджэнне". Дзеля таго, каб узнавіць цэласнасць космасу, выратаваць ад энтрапіі забыцця.

Праект "Адкуль родам знакі на нашых ручніках?" прадстаўляе вынік шматгадовай працы музея, які змяшчае матэрыялы экспедыцыйных і фондавых навуковых даследаванняў ткацкіх традыцый паўднёвага ўсходу Беларусі.

Выстава "Арнаменты Падняпроўя: Сон і абуджэнне” працягне знаёміць вас з нашымі неверагоднымі напрацоўкамі, знаходкамі і адкрыццямі за ўвесь гэты час.

Выставачны праект будзе цікавы для ўсіх, хто цікавіцца традыцыйнай культурай ды сваімі каранямі.

Запрашаем на сустрэчу з традыцыяй.

 Калі: 07.03.2024 у 16:00.

 Дзе: г. Гомель, плошча Леніна, 4а (у парку, за саборам Пятра і Паўла).

Уваход вольны!

 +375 232 50-96-98